Akpa Edikot ŋwed – Utom Mme Apostle 2:1-11

Ibuot ikↄ: Ndien Edisana Spirit ↄyↄhↄ kpukpru mmↄ ke idem, mmↄ enyuŋ etↄŋↄ ndisem nsio-nsio usem.

Ekem ke ini osimde usen Pentecost, kpukpru mmↄ edu ↄtↄ kiet. Ndien idaha kiet uyom oto ke enyↄŋ edi, ebiet uyom ata ↄkpↄsↄŋ oyobio eke ofimede, enye onyuŋ ↄyↄhↄ ofuri ufↄk oro mmↄ etiede ke esit. Mmↄ enyuŋ ekut mme edeme eke esakde ikaŋ, nte edemede idem edoro mmↄ ke ibuot, edeme kiet ke owo kiet. Ndien Edisana Spirit ↄyↄhↄ kpukpru mmↄ ke idem, mmↄ enyuŋ etↄŋↄ ndisem nsio-nsio usem, nte Spirit ↄnↄde mmↄ ukeme nditiŋ. Edi mme Jew, eke ekponode Abasi, eto ke kpukpru mme idut ke idak ikpa-enyↄŋ edi ediduŋ ke Jerusalem. Ke ini mmↄ ekopde uyom emi, otu owo ebono ↄtↄ kiet, idem onyuŋ akpa mmↄ, koro mmↄ kiet kiet ekopde nte mmↄ oro esemde usem mmↄ. Ndien enyene kpukpru mmↄ ndyↄ, mmↄ enyuŋ eyik, ete, sese, nte kpukpru mmↄ emi etiŋde tiŋ idige nditↄ Galilee? Nsidi ntak ndien eke kpukpru nnyin ikopde nte mmↄ esemde usem eke ikamanade ke esit? Mme Parthian ye mme Mede ye mbon Elam, ye mme andiduŋ ke Mesopotamia, ye ke Judæa ye ke Cappadocia, ye ke Pontus ye ke Asia, ye ke Phrygia ye ke Pamphylia, ye ke Egypt ye ke edem Libya emi ekperede Cyrene, ye mbon Rome emi edaŋde ke Jerusalem, mme Jew ye mme Gentile emi enamde ŋkpↄ enↄ Abasi ke ido mme Jew ye mbon Crete ye eke Arabia, nnyin imokop mmↄ etiŋ ata mkpↄsↄŋ utom Abasi ke usem emana nnyin.

Psalm 104: 1, 24ac. 29b-30. 31, 34

Ibↄrↄ: Nↄ spirit fo edi, O Ↄbↄŋ, nyuŋ nam iso ererimbot edi obufa.

Ukpↄŋ mi kↄm Ↄbↄŋ Abasi

O Ↄbↄŋ Abasi mi Afo omokpon eti-eti

O Ↄbↄŋ Abasi ŋkpↄ emi Afo anamde ewak didie

Inyene fo ↄyↄhↄ ke ererimbot.

Ataŋ ibifik mmↄ, mmↄ enime

Enyuŋ efiak ke ntan mmↄ

Afo ↄdↄŋ Spirit fo ↄwↄrↄ, mmↄ eboro

Afo onyuŋ ↄdiↄŋ iso isↄŋ.

Ubↄŋ fo eyedu ke nsi-nsi

Ↄbↄŋ Abasi eyedat esit ke ŋkpↄ emi enye anamde

Ekikere mi eke abaŋade enye eyenem mi esit

Ami nyedara Ↄbↄŋ Abasi.

Udiana Edikot ŋwed – Ŋwed mbon Rome 8:8-17

Ibuot ikↄ: Adaŋa owo nte Spirit Abasi adade mmↄ usuŋ, mmↄ oro edi nditↄ Abasi.

Mmↄ emi edude ke obukidem inyuŋ ikemeke ndinem Abasi esit. Edi mbufo iduhe ke obukidem, edi edu ke spirit, edieke spirit Abasi oduŋde ke esit mbufo. Edi edieke owo minyeneke Spirit Christ, enye idige owo Christ. Edi edieke Christ odude ke esit mbufo, ikpↄhidem ama akpa oto ke idiↄk-ŋkpↄ, edi Spirit ke odu uwem oto ke edinen ido. Edi edieke Spirit Abasi emi akanamde Jesus eset ke mkpa oduŋde ke esit mbufo, Enye emi akanamde Christ Jesus eset ke mkpa enyenyuŋ anam ikpↄhidem mbufo emi enyenede ndikpa edu uwem, oto ke Spirit Esie emi oduŋde ke esit mbufo. Mmↄdo, nditↄ-ete, nnyin idi mme akama-isↄn; edi nnyin ikamake obukidem isↄn, ndidu uwem nte obukidem etemede, mbufo enyene ndikpa; edi edieke mbufo edade Spirit, mbufo ewot erinam eke obukidem anamde, mbufo eyedu uwem. Koro adaŋa owo nte Spirit Abasi adade mmↄ usuŋ, mmↄ oro edi nditↄ Abasi. Koro mbufo mikↄbↄhↄ Spirit ufin eke esinde mbufo etↄŋↄ ntak enyene ndik; edi mbufo ekↄbↄ Spirit eke enyenede mmↄ emi edade esin ke ubon Abasi, emi anamde nnyin ikot Abasi, ite, Abba, Ete. Spirit ke idem Esie etiene Spirit nnyin edi ntiense ete, nnyin idi nditↄ Abasi. Edi edieke nnyin idide nditↄ, imonyuŋ inyene udeme ke se enimde enↄ nditↄ; imenyene udeme ke se Abasi onimde; imasaŋa ye Christ inyene udeme: koro ana nte nnyin ima ikut ndutuhↄ ye Enye, iyenyuŋ ida ubↄŋ ye Enye.

SEQUENCE

Eti Spirit uñwana,

Nọ uyama Fo K’enyọñ,

Edidu ke esit nnyin

Di Ete mbon unana

nọ nyin ediwak mfon

Nọ nnyin uñwana uwem

Di Ete Idọñesit

Di nọ nnyin inemesit;

Nam nnyin idu ke emem

Nọ nsọñidem k’utom

Nọ usuk ke mfiopidem

Sio nnyin fep ke afanikọñ

Afo uñwana Abasi

Suk enyin Ke esit nnyin;

Di duñ nnyin K’esit idem;

K’uyak grace ọbọhọ nnyin;

Koro enye mmiduje

Ukpọñ nnyin emem idem

⁠Kok munan, nọ nsọñidem;

Sin uyai je ukpọñ nyin

Sio ntọi idiọkñkpọ;

Nọ esit nsuhọridem;

Nyaña mme mbon mbuọtidem.

Nọ mfọn itiaba Fo

Esọk mti Ikọt Fo

Emi ekponode Fi;

Du ye mmọ k’ini mkpa;

Nọ mmọ uwem ko k’enyọñ;

Nọ mmọ emem ke nsi-nsi

Amen. Alleluia

Mkpo idara: Di O Edisana Spirit duk yↄhↄ ke mme esit nti ikↄt fo, nyuŋ domo ikaŋ ima fo ke esit mmↄ.

Etimbuk – John 14:15-16. 23b-26

Ibuot ikↄ: Edisana Spirit, eyekpep mbufo kpukpru ŋkpↄ.

Ke ini oro; Jesus ↄdↄhↄ mmↄ ete: Mbufo ema ema Mi, eyenim mbet Mi. Nyenyuŋ mbeŋe Ete, ndien Enye eyenↄ mbufo Iberedem efen, man Enye edidu ye mbufo ke nsinsi. Edieke owo amade Mi, eyenim uyo Mi; ndien Ete Mi eyema enye, nnyin iyenyuŋ idi ididuŋ ye enye. Owo eke mimaŋa Mi inimke se ntiŋde; ndien ikↄ eke mbufo ekopde idige okim, edi enyene Ete emi ↄkↄdↄŋde Mi. Ŋtiŋ ŋkpↄ emi nnↄ mbufo, ke adaŋemi nsuk ndude kaŋa ye mbufo. Edi Iberedem, kpa Edisana Spirit, emi Ete edinↄde edi ke enyiŋ Mi, Enye eyekpep mbufo kpukpru ŋkpↄ onyuŋ anam mbufo eti kpukpru se Ami ŋketiŋde nnↄ mbufo.