Akpa Edikot Ŋwed: Utom Mme Apostle 7:55-60

Ibuot ikↄ: Sese, mmokut Eyen Owo nte adade ke ubↄk nnasia Abasi.

Edi Stephen ye uyↄhↄ Edisana Spirit owuk enyin ese enyↄŋ, okut ubↄŋ Abasi, ye Jesus nte adade ke ubↄk nnasia Abasi, onyuŋ ↄdↄhↄ ete, Sese, mmokut heaven nte anade iŋwaŋ, mmonyuŋ ŋkut Eyen Owo nte adade ke ubↄk nnasia Abasi. Edi mmↄ efiori ke ↄkpↄsↄŋ uyo, esiri utↄŋ, ebumere ye esit kiet ekefuk enye; ndien mmↄ ebin enye esio ke mme obio, enyuŋ etↄŋↄ enye ke itiat: mme ntiense enyuŋ enim ↄfↄŋidem mmↄ ke ukot akparawa kiet emi ekerede Saul. Ndien mmↄ etↄŋↄ Stephen ke itiat, nte enye esemede okot Ↄbↄŋ, ete, Ↄbↄŋ Jesus, bↄ ukpↄŋ mi. Enye onyuŋ ↄtↄŋↄ edↄŋ, ofiori ke ↄkpↄsↄŋ uyo ete, Ↄbↄŋ, kuda idiↄk-ŋkpↄ emi udori mmↄ. Ndien ke ama eketiŋ ntre, enye ede.

Psalm 97:1, 2b. 6, 7c. 9

Ibↄrↄ: Ↄbↄŋ Abasi edi edidem emi okoŋde akan ofuri ererimbot.

Ↄbↄŋ Abasi edi edidem yak ererimbot ebre

Yak uwak isuo edat esit

Edinen ido ye ikpe edi itie ebekpo esie.

Enyↄŋ etaŋ eti ido esie

Kpukpru mme idut enyuŋ ekut ubↄŋ esie.

Mbufo kpukpru mme Angel etuak ibuot enↄ enye.

Koro afo O Ↄbↄŋ Abasi edide ata edikoŋ akan ofuri ererimbot

Afo omokoŋ eti-eti akan kpukpru abasi.

Udiana Edikot Ŋwed: Eriyarare 22:12-14. 16-17. 20

Ibuot ikↄ: Di, Ↄbↄŋ Jesus.

Sese, mmↄŋ ndedi idaha emi; nnyuŋ nsaŋa ye utip Mi, ndinↄ kpukpru owo nte ekemde ye ubↄk-utom esie. Ami ndi Alpa ye Omega, mbemiso ye akpatre, ntↄŋↄ ye utit. Ↄfↄfↄŋ ↄnↄ mmↄ eke eyetde ↄfↄŋidem mmↄ asana, man mmↄ ekpenyene unen ndisim eto uwem, ekpenyuŋ ebe ke inua-otop eduk ke esit obio. Ami Jesus ŋkↄdↄŋ angel Mi edisian fi ikↄ emi, man ada ↄnↄ mme ufↄk Abasi. Ami ndi Oruŋ ye Eyen David, ediyama ntantafiↄŋ usenubↄk. Spirit ye ŋwan-ndↄ edↄhↄ ete, Di. Owo eke onyuŋ okopde, yak enye ↄdↄhↄ ete, Di. Owo eke itↄŋ asatde, yak enye edi. Owo eke amade, yak edi edibↄ mmↄŋ uwem ke ikpikpu. Anditiŋ ikↄ emi ete, Ke akpanikↄ, mmↄŋ ndedi iwiwa. Amen. Di, Ↄbↄŋ Jesus.

Mkpo idara: Ami ndikpↄŋke mbufo nte nditↄ akpa, Ↄbↄŋ ↄdↄhↄ; nyefiak ntiene mbufo, ndien idara eyeyↄhↄ ke esit mbufo.

Etimbuk: John 17:20-26

Ibuot ikↄ: Man mmↄ edi kiet, kpa nte nnyin idide kiet

Mbeŋeke mbaŋa mmↄ emi ikpↄŋ, edi mbeŋe mbaŋa mmo nde eke ebuↄtde idem ye Ami oto ke ikↄ mmↄ, man mmↄ kpukpru ekpakam edi kiet, nte Afo, Ete, odude Mi ke idem, Ami nnyuŋ ndude ke Afo; man mmↄ enyuŋ edu ke nnyin: man ererimbot enim ke akpanikↄ ete, edi Afo ↄkↄdↄŋ Mi. Mmonyuŋ nyak ubↄŋ emi Afo ↄkↄnↄde Mi nnↄ mmↄ; man mmↄ edi kiet, kpa nte nnyin idide kiet; man Ami ndu ke esit mmↄ, Afo onyuŋ odu ke esit Mi, man mmↄ ekabare efↄn ema edi kiet edehe; man ererrimbot efiↄk ete edi Afo okosio Mi ↄdↄŋ, omonyuŋ ama mmↄ, kpa nte akamade Mi. Ete, mmoyom nte mmↄ emi Afo ↄkↄnↄde Mi edidu ye Ami ke ebiet eke ndude; man mmↄ ekut ubↄŋ Mi emi Afo ↄkↄnↄde Mi: koro Afo akamama Mi, ndien ediwuk adaha ererimbot. O edinen Ete, ererimbot ikↄfiↄkke Fi, edi Ami mmↄfiↄk Fi; mmↄ emi enyuŋ efiↄk ete Afo ↄkↄdↄŋ Mi. Ndien mmayarare enyiŋ Fo nnↄ mmↄ, nyenyuŋ nyarare: man ima emi Afo akamade Mi odu mmↄ ke esit, Ami nnyuŋ ndu mmↄ ke esit.